CD kritika / Joseba Martin • Matraka, Berria

Imanol eta Joni Ubeda anaiek etxeko argazkietan aurkitu dute azken lanaren haria: aitona, CNTkoa zelarik, Frantzian desagertu zen gerraldian; birraitona, UGTkoa, Urbasan fusilatu zuten nazionalek. Hortik hasita, Joseba Tapiak Agur intxorta maite lanean egin zuen moduan, ikertzen hasi ziren liburuetan, kontakizunetan, bertsolaritzan eta antzinako diskoetan, 13 istorio dramatiko hauek bete arte: Madrilen, Avilesen, Bartzelonan edo Nafarroan gertatzen dira. Banda ohiko pop-rock estiloan aritu arren, kantuek ez dute zapore mingotsa eta latza galtzen. Entzun, esaterako, Gazte ziren, aske ziren, Gau ilunean, Berandu nator, Trece rosas rojas edota Les dones del 36. Pop estiloa euskaraz egitea arriskutsua bada, horrelako lan kontzeptuala, serioa eta sakona askoz arriskutsuagoa, baina beharrezkoa memorian bizirik irauteko.